Bydd Cig Oen Cymru PGI a Chig Eidion Cymru PGI yn cael eu cyflwyno i brynwyr a mewnforwyr rhyngwladol wrth i gorff ardoll cig coch Cymru, Hybu Cig Cymru (HCC), baratoi i fynychu sioe fasnach bwyd a diod enwog – Anuga.
Fe’i cynhelir yn Cologne rhwng 4 ac 8 Hydref, a bydd HCC yn mynychu'r sioe fasnach ar y cyd ag allforwyr o Gymru.
Mae Anuga yn digwydd bob dwy flynedd ac yn dod â gweithgynhyrchwyr a phrynwyr bwyd a diod o bob cwr o'r byd ynghyd. Mae mwy na 140,000 o dros 200 o wledydd yn ymweld â’r sioe.
Dywedodd Arweinydd Datblygu’r Farchnad HCC, Jason Craig:
“Mae marchnadoedd allforio’n parhau i fod yn llwybr pwysig i sector cig coch Cymru. Rydyn ni’n gweld galw am Gig Oen Cymru a Chig Eidion Cymru ledled Ewrop a thu hwnt wrth i gwsmeriaid geisio mwy o gynhyrchion cig coch cynaliadwy o ansawdd uchel. Yn ogystal, mae marchnadoedd allforio hefyd yn helpu i gynnal cydbwysedd carcas, gan ategu elw i ffermwyr a’r diwydiant.”
Aeth Jason yn ei flaen i ddweud:
“Mae mynychu Anuga yn caniatáu i allforwyr Cymru gadw cysylltiadau â chwsmeriaid presennol, gweithredu fel ffenestr siop ar gyfer y manwerthwyr o’r Almaen, Rewe ac Edeka, tra hefyd yn archwilio marchnadoedd a mewnforwyr newydd i sicrhau dyfodol llewyrchus i sector cig coch Cymru.”
Yn ogystal â chynnal cyfarfodydd a chyfleoedd i flasu cynhyrchion ar eu stondin fasnach, mae HCC hefyd yn cynnal derbyniad Blas o Gymru ar y cyd â Llywodraeth Cymru ddydd Llun 6 Hydref.
