Cefnogi gwerthiant Cig Oen Cymru yn ne yr Eidal
Dinas Naples yn yr Eidal oedd cyrchfan ddiweddaraf Cig Oen Cymru. Fe ymddangosodd mewn digwyddad preifat a drefnwyd gan un o brif archfarchnadoedd canolbarth a de y wlad.
Mae gan y manwerthwr tua 500 o siopau ac fe gynhaliwyd yr arddangosfa o gynnyrch amrywiol ar gyfer eu rheolwyr, yn cynnwys y rhai sy’n gyfrifol am gownteri ac adrannau cig, gyda chyfle i bob un ohonynt gael blasu.
Mynychodd Elwen Roberts, Swyddog Gweithredol y Defnyddwyr yn Hybu Cig Cymru (HCC) ar ran y cwmni. Meddai: “Mae’r archfarchnad wedi bod yn gwerthu Cig Oen Cymru ers sawl blwyddyn – ysgwydd cig oen yn bennaf – felly fe benderfynon ni roi’r cyfle iddynt flasu rhywbeth gwahanol. Fe wnes i baratoi brest Cig Oen Cymru gyda stwffin Eidalaidd yn cynnwys olifau a thomatos heulsych, cawsant eu coginio’n araf nes eu bod yn frau a’u sleisio i’w gweini.
“Daeth cannoedd o reolwyr y siopau i flasu, ac roedd yn gyfle gwych i gael siarad efo nhw’n uniongyrchol am rinweddau’r cig a’r dulliau cynhyrchu; roedd yn bositif iawn. Gyda’r nos, fe gynhaliwyd barbeciw gyda Chig Oen Cymru ar y fwydlen – cyfle gwych arall i arddangos amlbwrpasedd a blas Cig Oen Cymru.”
Mae’r Eidal yn farchnad sefydledig ar gyfer Cig Oen Cymru a’r bumed farchnad fwyaf ar draws y byd ar ôl Ffrainc, yr Almaen, Gwlad Belg a’r Iseldiroedd.
