Geneteg Defaid Cymru yn agor i geisiadau ar 1 Gorffennaf
O 1 Gorffennaf ymlaen, gwahoddir ffermwyr i gofrestru eu diddordeb i ymuno â Geneteg Defaid Cymru (WSG) ar gyfer Cam 2 o’r prosiect. Gyda HCC yn arwain, mae’n cael ei gynllunio i helpu bridwyr i wella’u cynhyrchiant, effeithlonrwydd a pherfformiad amgylcheddol, gan gefnogi penderfyniadau bridio gwybodus sy’n seiliedig ar dystiolaeth.
Bydd cyfranogwyr yn derbyn cymorth ymarferol, technegol ac ariannol i’w helpu i wneud y gorau o welliannau genetig hirdymor. Bydd y rhaglen hefyd yn adeiladu ar set ddata a ddatblygwyd yn wreiddiol drwy’r Cynllun Hyrddod Mynydd (a ddarparwyd yn flaenorol gan HCC) a Cham 1 o’r WSG (a ddarparwyd yn flaenorol gan Gyswllt Ffermio).
Bydd ffermwyr sy’n ymuno â WSG yn elwa o:
- Genoteipio ŵyn wedi’i ariannu’n llwyr ar gyfer adnabod rhianta sy’n seiliedig ar DNA
- Gwerthusiadau genetig a sganio braster cefn uwchsain wedi’u hariannu
- Meincnodi perfformiad eu stoc
- Mynediad at dechnolegau genetig a genomeg o’r radd flaenaf
- Canllawiau a chymorth gyda chofnodi DNA pedigri ac â llaw
Meddai Dr Eleri Thomas, Swyddog Gweithredol Effeithlonrwydd a Chynaliadwyedd y Diwydiant yn HCC: “Os hoffech elwa o’r cymorth hwn a defnyddio genomeg i ddatblygu eich diadell o ddefaid, nodwch y 1af o Orffennaf yn eich dyddiadur, sef y dyddiad y bydd y ffenestr yn agor i fynegi eich diddordeb mewn ymuno â’r prosiect.”
Bydd y gwaith yn canolbwyntio ar ddatblygu dangosyddion perfformiad allweddol cadarn, cynlluniau gweithredu wedi’u teilwra ar lefel fferm, ac ystod o fentrau ymchwil sydd â’r nod o ysgogi arloesedd o fewn y sector.
Bydd y wybodaeth enetig a gesglir yn gwella meincnodi’r diwydiant ac yn cefnogi cynllunio busnes tymor hir, gan gryfhau cadwyni cyflenwi, cyflwyniad cynhyrchion, a photensial marchnata diadelloedd i fridwyr yn y pen draw.
Yn y cyfamser, cysylltwch â HCC yn uniongyrchol am ragor o wybodaeth – info@hybucig.cymru neu 01970 625050.
