Cig-weithio: i feithrin cysylltiadau o fewn y gadwyn gyflenwi cig coch

Enw: Ben Roberts

Lleoliad: Cigydd/Perchennog Siop

Swydd: Farndon, Sir Caer

“Drwy fod yn rhan o Cig-weithio, rwy’n edrych ymlaen at ddysgu mwy am y diwydiant cig coch. Mae cael cyfle i wella fy nealltwriaeth o’r gadwyn gyflenwi sy’n cynhyrchu cynnyrch o safon yn gyson, a chael y cyfle i fwydo hynny yn ôl i gwsmeriaid yn fraint.

“Rwy’n edrych ymlaen hefyd at gysylltu gyda phobl ifanc o fewn y diwydiant sydd â’r un angerdd a fi, a gobeithiaf y bydd yn gyfle i wneud ffrindiau ar gyfer y dyfodol.”

Enw: Lynfa Jones

Lleoliad: Ysgrifennydd Cymdeithas Gwartheg Duon Cymru

Swydd: Y Trallwng, Powys

“Cefais fy magu ar fferm ddefaid a gwartheg yng nghanolbarth Cymru ac rwy’n gweithio fel ysgrifennydd brîd. Rwyf yn edrych ymlaen at fod yn aelod o’r grŵp Cig-weithio eleni gan ei fod yn gyfle ffantastig i gydweithio gyda phobl debyg i mi sy’n angerddol am ddyfodol cig Cymru.

“Mae’n gyfle i rannu syniadau a dysgu gan eraill ar draws y diwydiant. Rwyf yn edrych ymlaen yn benodol at gyfrannu at drafodaethau yn ymwneud â chynaliadwyedd a sut y gallwn gysylltu’n well gyda chwsmeriaid – tra’n hyrwyddo safon uchel a threftadaeth ffermio da byw yng Nghymru. Fy mhrif angerdd yw addysgu’r gymdeithas ehangach a chwsmeriaid am y broses o’r fferm i’r fforc.”

Enw: Thomas Davies

Lleoliad: Aberaeron, Ceredigion

Swydd: Masnachwr Amaethyddol yn Wynnstay

“Bydd y wybodaeth a’r rhwydweithiau y byddaf yn eu hennill drwy’r rhaglen yn cael eu rhannu’n uniongyrchol gyda fy nghleientiaid yn y gwaith. Boed hynny drwy eu helpu i addasu i reoliadau amgylcheddol newydd, archwilio arferion carbon effeithlon, neu wella cynhyrchiant drwy dechnoleg, byddaf yn rhoi’r hyn a ddysgaf ar waith i gyflawni gwerth go iawn. Yn ogystal, byddaf yn gallu gweithio’n fwy cydweithredol gyda fy nghydweithwyr a chyflenwyr o fewn Wynnstay, gan gyfrannu at arbenigedd mewnol cryfach a gwasanaeth cwsmeriaid.”

Enw: Erin McNaught

Lleoliad: Bala

Swydd: Ffermwr

“Bydd y rhaglen yma yn cefnogi fy natblygiad o fewn y sector cig coch drwy fy helpu i adeiladu ar feysydd rwyf eisoes yn angerddol amdanynt, yn ogystal ag ehangu ar feysydd gwybodaeth newydd a fydd o fudd i’m rôl bresennol a’m cynlluniau ar gyfer y dyfodol. Rwy’n arbennig o awyddus i ddysgu mwy am eneteg anifeiliaid, yn enwedig wrth i mi weithio i wella fy niadell Gymreig gyda’r nod o fridio mamogiaid fel anifeiliaid cadw ar gyfer ein diadell sy’n wyna’n gynnar. Bydd deall geneteg yn well yn caniatáu i mi wneud penderfyniadau bridio gwell, gan wella cynhyrchiant a pherfformiad hirdymor y ddiadell.”

Enw: Richad Watkins

Lleoliad: Malvern, Swydd Henffordd

Swydd: Prynwr da byw gyda Kepak Merthyr Tudful

“Rwy’n gobeithio y bydd y rhaglen hon yn ehangu fy ngwybodaeth am y diwydiant ac yn caniatáu i mi wneud cysylltiadau newydd a fydd yn datblygu fy sgiliau i wella fy mherfformiad presennol yn y gwaith. Drwy gymryd rhan yn y cwrs, bydd yn rhoi cipolwg i mi ar ffactorau a materion eraill o fewn y diwydiant a allai effeithio’n anuniongyrchol ar fy rôl nad wyf yn eu hystyried ar hyn o bryd. Rwy’n edrych yn gyson i wella a datblygu fy mherfformiad a fydd yn caniatáu i mi fedru addasu pan fydd newidiadau’n codi a allai effeithio ar y diwydiant.”

Enw: Rachel Andrew Jones

Lleoliad: Llandinam, Powys

Swydd: Darlithydd Amaethyddiaeth, Grŵp colegau NPTC, Y Drenewydd.

“Bydd y rhaglen yn ehangu fy ngwybodaeth fel ffermwr a darlithydd ac yn rhoi cipolwg gwerthfawr ar dueddiadau’r farchnad, disgwyliadau defnyddwyr, a gofynion rheoleiddio, gan fy ngalluogi i addasu fy musnes fferm i ddiwallu gofynion newidiol y defnyddiwr. Bydd Cig-weithio hefyd yn fy arfogi â’r wybodaeth a’r cysylltiadau i redeg menter ffermio fwy effeithlon, cynaliadwy a gwydn, gan gefnogi fy natblygiad personol fel darlithydd a ffermwr a llwyddiant hirdymor y diwydiant.”

Enw: Bethany Rodgers

Lleoliad: Gwendwr, Llanfair ym Muallt

Swydd: Swyddog caffael cig oen a’r gadwyn gyflenwi

“Bydd y cyfleoedd y mae’r rhaglen Cig-weithio yn eu cynnig yn amhrisiadwy, gan roi cyfle i mi weld meysydd amrywiol ac arbenigol y diwydiant cig coch yng Nghymru.

“Mae hi’n ddyddiau cynnar ar fy ngyrfa o fewn y sector, ac rwy’n edrych ymlaen at feithrin gwybodaeth a phrofiadau y gallaf eu defnyddio yn fy rôl bresennol a thu hwnt. Rwy’n edrych ymlaen at ddysgu gan fentor yn y diwydiant, tra hefyd yn adeiladu ar fy rhwydweithiau fy hun o fewn y diwydiant”

Enw:Emma Williams

Lleoliad: Llanddeusant, Anglesey

Swydd: Ffermwr/ Perchennog Cig Clwch

“Drwy ddod yn aelod o’r rhaglen Cig-weithio, rwy’n gobeithio deall y gadwyn gyflenwi ymhellach. Rwyf bob amser yn cymryd diddordeb brwd ym mhob agwedd ar iechyd anifeiliaid ac wrth fy modd yn holi’r milfeddyg pan fydd yn mynychu’r fferm i wella fy nealltwriaeth o sut a pham mae problemau iechyd yn digwydd. Byddwn wrth fy modd yn cael mwy o wybodaeth am bob agwedd ar y gadwyn gyflenwi cig coch er mwyn gallu siarad yn hyderus â’n cwsmeriaid am y cig gwych rydym yn ei gynhyrchu, y milltiroedd bwyd isel a’r safonau lles uchel.

Rwy’n angerddol am hyrwyddo ein cig eidion ar y cyfryngau cymdeithasol ac arddangos ffermwyr lleol eraill a’r gwaith caled sy’n cael ei gyflawni i gynhyrchu bwyd.”