Manteision cofnodi EID

Mae hyn yn golygu y gallwch nodi’n haws y defaid hynny sy’n gwneud y cyfraniad mwyaf at incwm a phroffidioldeb eich fferm, a’r rhai hynny sy’n gostus i chi eu cadw.

Gall system adnabod EID sicrhau gwell proffidioldeb ar gyfer eich busnes defaid trwy:

• Wella’r broses o ddewis stoc ar gyfer bridio.
• Gwella’r broses o ddewis stoc ar gyfer eu lladd.
• Galluogi defnydd mwy effeithiol o feddyginiaethau milfeddygol, gan arwain yn y pen draw at well iechyd yn y praidd.
• Eich galluogi i gyflawni arbedion maint trwy reoli praidd mwy, yn ogystal â’r gallu i asesu perfformiad anifeiliaid unigol.
• Eich galluogi i gofnodi gwybodaeth ychwanegol, er enghraifft perfformiad ŵyn o wahanol rannau o’ch fferm. Gall hyn eich helpu i amlygu tir pori lle mae defaid yn perfformio’n wael.
• Fe all hefyd helpu eich cynlluniau ailhadu a chynorthwyo i leihau dibyniaeth ar fwydydd anifeiliaid sy’n cael eu prynu.
• Lleihau gwastraff ac arbed arian ar waredu gwastraff.
• Cynnig cyfle i chi rannu gwybodaeth yn haws gyda’ch milfeddygon er mwyn iddynt gael dealltwriaeth well o anghenion iechyd eich praidd.
• Cynnig y potensial i ddefnyddio gwybodaeth i farchnata eich stoc yn well.

• Mae’n arbed gorfod ysgrifennu rhifau adnabod, dyddiadau a gweithgareddau unigol. Mae hyn yn golygu bod modd casglu gwybodaeth yn rhwydd am nifer fawr o anifeiliaid, a hynny’n gyflym ac yn fwy cywir. Mae’n lleihau camgymeriadau a’r gwaith papur sy’n gysylltiedig â chofnodion symudiadau anifeiliaid/llyfrau meddyginiaeth ac ati.
• Nid oes angen cyffwrdd â’r anifeiliaid i’w hadnabod yn gywir. Mae hyn yn golygu y gellir casglu rhifau adnabod heb fod angen darllen y tagiau clustiau, gan wneud y broses yn fwy cyflym a diogel i’r rhai sy’n gysylltiedig. Gellir lleihau risgiau iechyd a diogelwch ymhellach fyth trwy ddefnyddio darllenydd data sydd â pheiriant pwyso / cytio awtomatig.
• Gellir llwytho’r wybodaeth adnabod a rheoli yn uniongyrchol i’ch cyfrifiadur, gan leihau’r amser a dreulir yn trawsgrifio gwybodaeth i’ch llyfr praidd, cyfrifiadur neu adnodd arall.
• Mae meddalwedd rheoli fferm yn caniatáu i chi ddadansoddi’r data rydych wedi’i gasglu, gan roi gwybodaeth reoli i chi ar gyfer seilio penderfyniadau yn ymwneud â pherfformiad y praidd.
• Mae EID yn rhoi’r holl wybodaeth i chi ar flaenau’ch bysedd – bydd dal darllenydd data yn agos i’r tag EID yn darparu’r holl wybodaeth sydd wedi’i storio ynglŷn â’r anifail penodol hwnnw. Gall hyn fod yn arbennig o ddefnyddiol o ran cyfnodau diddyfnu o gyffuriau wrth i ŵyn gyrraedd rhan olaf y broses pesgi. Mewn rhai achosion, gellir cysylltu gwybodaeth â’ch ffôn clyfar hefyd.
• Mae EID yn lleihau costau llafur yn sylweddol oherwydd gellir rheoli mwy o anifeiliaid yn effeithiol gan lai o bobl. Mae’r cyfuniad o offer awtomataidd gydag EID yn cynnig y gallu i adnabod anifeiliaid yn awtomatig wrth iddynt fynd trwy system drin, fel y gellir pwyso a didoli mwy o anifeiliaid fesul awr. Gall hyn fod yn fuddiol iawn i systemau ffermio llai dwys.
• Mae EID yn cynyddu’r cyfle i yrru mamogiaid ac ŵyn trwy gratiau pwyso electronig yn amlach nag a fyddai’n bosibl â llaw, gan ganiatáu i chi gadw llygad ar gyflwr mamogiaid ar ôl diddyfnu a faint o bwysau y mae ŵyn yn eu magu. Os nad yw mamogiaid yn adfer i gyflwr da, mae’n bosibl y bydd ganddynt broblem tymor hir, a gall ŵyn nad ydynt yn cyrraedd pwysau targed gael eu harchwilio am broblemau iechyd, fel llyngyr neu glwy’r traed.
• Mae EID yn caniatáu i ffermwyr defaid sy’n cadw preiddiau mawr a symudir yn rheolaidd rhwng daliadau gofnodi symudiadau’n gyflym ac yn rhwydd a chadw llygad ar ble mae defaid unigol wedi bod.
• Mae’r llif gwybodaeth gwell yn eich galluogi i wneud penderfyniadau mwy gwrthrychol ac amserol, gan felly wella perfformiad eich praidd a’ch busnes.

Mae EID yn cynnig llawer o gyfleoedd. Yr hyn sy’n allweddol er mwyn ei ddefnyddio’n effeithiol yw peidio â’i wneud yn rhy gymhleth a defnyddio’r dechnoleg i’r lefel lle y gallwch weld budd ac elw, y tu hwnt i’r hyn sydd ei angen at ddibenion adnabod syml.