Fel rhan o raglen Cig-weithio HCC, mae ei aelodau presennol wedi trin a thrafod amrywiaeth eang o bynciau perthnasol, o gynaliadwyedd a rheoli glaswelltir i eneteg defaid, gyda chyfleoedd i gwrdd ag arweinwyr o’r diwydiant ar hyd y ffordd.
Roedd eu sesiwn ddiwethaf yn canolbwyntio ar gynhyrchu cig eidion a geneteg, gydag ymweliad â Fferm Warren, Caer ble cyfarfu’r criw ag Arwel Owen, Rheolwr Cadwyn Gyflenwi Cig Eidion gyda Genus ABS. Mae’r teulu Jones yn Fferm Warren yn cydweithio’n agos gyda Genus i gofnodi data ac effeithlonrwydd porthiant eu gwartheg ac yn defnyddio’r dechnoleg ddiweddaraf i fagu a phesgi eu stoc ifanc. Maent yn cofnodi defnydd porthiant a dŵr, ac mae eu hymrwymiad i’r amgylchedd a chynaliadwyedd wedi’u harwain at fesur methan.
Mwynhaodd y grŵp daith o amgylch y fferm ac fe greodd y system effeithlon a’i safonau lles anifeiliaid uchel, gryn argraff arnynt.
Ymunodd cydweithiwr Arwel â sesiwn y prynhawn, sef Finlay Murchie o Genus, a bu’n siarad am safle Genus yn Rhuthun, sut mae’n gweithredu, sut maen nhw’n dewis, casglu a storio eu samplau i adeiladu eu storfeydd a datblygu geneteg bîff i’r dyfodol.
Mae Lynfa Jones, aelod o Cig-weithio, yn Ysgrifennydd Cymdeithas y Gwartheg Duon Cymreig ac meddai: “Roedd yr ymweliad a’r drafodaeth yma gyda Genus yn werthfawr iawn ac yn berthnasol i fy ngwaith. Mae gennyf well dealltwriaeth o’r busnes yn Fferm Warren a’r gwasanaethau a gynigir gan Genus ac rwy’n gobeithio gallu rhannu’r wybodaeth yma gyda fy nghysylltiadau yn y sector cig eidion.”
Mae’r cynllun Cig-weithio hefyd yn cynnig cyfle i’r aelodau dreulio diwrnod mewn gweithle gyda mentor o’r sector cig coch. Mae’r cyfarfodydd cychwynnol wedi’u cynnal a dyddiadau wedi’u gosod ar gyfer yr ymweliadau yn y gweithle.
