Mae’r system symudiadau defaid, geifr a cheirw electronig i Gymru, EIDCymru yn nodi ei ben-blwydd yn ddeng mlwydd oed gyda datblygiadau mawr yn ystod y flwyddyn.
Mae EIDCymru yn darparu system cofnodi symudiadau electronig modern a chadarn, a fyddai’n galluogi ymateb cyflym ac effeithiol mewn cyfnodau o glefyd. Mae’n galluogi ceidwaid i gofnodi symudiadau yn effeithlon hefyd, ac yn cyfrannu at ddatblygiad busnesau amaethyddol modern a phroffesiynol. I ddefnyddwyr, mae’n system sy’n bodoli i sicrhau olrheinedd llawn a sicrwydd tra’n cefnogi statws Cig Oen Cymru PGI.
Ers ei lansio yn Ionawr 2016, mae 2.2 miliwn o symudiadau sy’n gyfystyr â 97.5 miliwn o ddefaid, wedi’u hadrodd i EIDCymru gan ffermwyr, marchnadoedd da byw, canolfannau casglu a lladd-dai yng Nghymru, yn ogystal â 45,000 o eifr a 2,700 o geirw.
Meddai Arweinydd EIDCymru, Gwion Aeron: “Yn y deng mlynedd ers sefydlu EIDCymru, mae ein tîm yn Aberystwyth yn falch o fod wedi datblygu a chynnig gwasanaeth effeithlon a defnyddiol i’r diwydiant amaeth yng Nghymru. Rydym wedi gweithio’n galed i sicrhau bod y platfform ar-lein yn darparu mynediad cyflym at yr amrywiaeth o wasanaethau defnyddiol sydd ar gael gennym. Roedden ni’n falch bod gan 80% o’r sawl a gwblhaodd eu stocrestr ym mis Rhagfyr 2025 gyfrif EIDCymru ar-lein ac yn ei ddefnyddio.
“Wrth i ni symud ymlaen, rydym ni’n gyffrous i fedru cynnig gwasanaethau ychwanegol gyda chyflwyniad system cofnodi symudiadau a chofrestru gwartheg ar EIDCymru yn nes ymlaen yn y flwyddyn. Bydd hyn yn gwneud bywyd yn haws i geidwaid da byw yng Nghymru a fydd yn gallu rheoli a chofrestru pob symudiad mewn un lle. Edrychwn ymlaen at weithio gyda’r diwydiant dros y misoedd sydd i ddod i sicrhau trawsnewidiad llyfn a di-dor.”
