Cynhaliwyd ail sesiwn grŵp Cig-weithio HCC yn Aberystwyth yn ddiweddar. Treuliwyd y bore yn cyfarfod arweinwyr yn y diwydiant a’r prynhawn yn canolbwyntio ar eneteg defaid.
Mae cynnig cyfle i’r aelodau greu cysylltiadau a datblygu eu dealltwriaeth o wahanol elfennau o’r gadwyn gyflenwi yn rhai o brif flaenoriaethau’r rhaglen, ac fe gynlluniwyd yr ail sesiwn i ateb y ddau bwrpas.
I gychwyn y diwrnod, cyfarfu’r grŵp yn swyddfa HCC i wrando ar dri siaradwr. Y cyntaf oedd José Peralta, Prif Weithredwr HCC a soniodd am ei gefndir a’i yrfa amrywiol yn niwydiant cig coch y DU. Amlinellodd ei rôl yn HCC a’i obeithion ar gyfer dyfodol y sefydliad a’r sector. Yn dilyn hynny, croesawyd Cadeirydd HCC, Catherine Smith a fu’n siarad am ei chyfrifoldebau fel Cadeirydd, rôl y Bwrdd a sut mae’n gweithredu.
Y trydydd siaradwr oedd Hazel Wright, rheolwr Canolfan Gwyddoniaeth Filfeddygol Cymru. Soniodd am ei chefndir ym maes polisi a’i swydd gyfredol ym maes iechyd anifeiliaid yn y Ganolfan. Pwysleisiodd bwysigrwydd cydbwysedd gwaith-bywyd ac am yr angen i fod yn angerddol am eich gwaith.
Yn y prynhawn, mwynhaodd y grŵp daith o amgylch Innovis, y cyflenwr arweiniol o dechnolegau bridio defaid i ddiwydiant da byw y DU. Arweiniwyd y sesiwn yma gan Dewi Jones - arweinydd arall yn y diwydiant a Phrif Weithredwr Innovis, a soniodd am ei gefndir a’r gwaith sy’n cael ei gyflawni yn Innovis. Siaradodd y genetegwr Janet Roden am ei gyrfa hithau ac yn fwy eang am eneteg defaid a’i rôl o fewn y diwydiant.
Meddai Erin McNaught, un o aelodau Cig-weithio:
“Roedd ein hail sesiwn yn cynnig mewnwelediad i’r gyrfaoedd amrywiol o fewn y diwydiant, gyda phrynhawn yn gweld cyfleusterau bridio Innovis ac yn dysgu am waith y sefydliad yn cefnogi’r sector defaid. Mwynheais y prynhawn yn Innovis, ac fe helpodd fi i benderfynu ar fy Mentor Cig-weithio, sef genetegwr o’r cwmni. Dw i’n edrych ymlaen at dreulio diwrnod gyda Janet Roden ac i ddysgu mwy am eneteg a sut y gallaf ddefnyddio’r wybodaeth adref ar y fferm.”
