Bydd Cig Oen Cymru PGI yn llenwi'r sgrin fawr unwaith eto'r haf hwn wrth i Hybu Cig Cymru (HCC) gynnal ei ymgyrch amlgyfrwng flynyddol i hyrwyddo Cig Oen Cymru mewn cartrefi ledled Cymru a Lloegr.
Yn nhrydedd ran yr ymgyrch 'Arbenigwyr yn eu Maes', mae HCC yn gosod ffermwyr Cymru ar flaen y gad yn eu hysbysebu. Mae ffermwyr o Ddinas Mawddwy, Lisa a Ken Markham, yn ymddangos yn hysbyseb deledu HCC sy'n rhedeg am sawl mis ar sianeli S4C a Sky, tra bod Emily Jones o Geredigion a Ben ac Ethan Williams o Gaerdydd yn ymddangos yn agweddau digidol yr ymgyrch.
Mae 'Arbenigwr ar y maes' ychwanegol wedi ymuno â'r ymgyrch eleni, sef cyn-chwaraewr rygbi Cymru a'r Llewod Prydeinig, Jonathan 'Fox' Davies. Yn ogystal â bod yn rhan o’r cynnwys cyfryngau cymdeithasol, ymunodd Jonathan hefyd â HCC ar eu stondin yn Sioe Frenhinol Cymru yn gynharach eleni. Wrth siarad am gael ei benodi’n llysgennad brand i Gig Oen Cymru, dywedodd Jonathan:
“Fel Cymro balch, a rhywun sy’n dwlu ar ei fwyd, mae’n wych bod yn gweithio gyda Chig Oen Cymru. Rwy’n gwybod pa mor bwysig yw treftadaeth ffermio i’n cymunedau gwledig a’r rhan y mae’n ei chwarae wrth gadw’r economi a’r cymunedau’n fyw.
“Fel rhywun sydd wedi teithio llawer gyda rygbi, rydw i wedi gweld sut mae Cig Oen Cymru’n cael ei barchu ledled y byd. Gyda iechyd a ffitrwydd hefyd yn bwysig i fi, rwy’n edrych ymlaen at ddangos nad yw cael diet iach a chytbwys, gyda bwyd fel Cig Oen Cymru, yn golygu gorfod cyfaddawdu ar ansawdd na blas.
Dywedodd Arweinydd Ymrwymiad Brand HCC, Pip Gill: “Mae ein hymgyrch Arbenigwyr yn eu Maes wedi taro nodyn da gyda chynulleidfaoedd ledled Cymru a Lloegr ac wedi gwneud lles o ran sut mae pobl yn ystyried dulliau ffermio yng Nghymru yn ogystal â Chig Oen Cymru fel cynnyrch.
“Rydym wrth ein bodd bod Jonathan yn ymuno â ni fel llysgennad brand eleni. Yr un fath â’n ffermwyr, mae Jonathan yn arbenigwr yn ei faes ac fel Cig Oen Cymru, mae ganddo enw da ledled y byd. Rydym yn edrych ymlaen at weithio gydag ef dros y misoedd nesaf wrth i ni hyrwyddo Cig Oen Cymru.”
I gyd-fynd â’r cyfnod pan fydd Cig Oen Cymru ar ei anterth, mae'r ymgyrch yn para drwy’r haf a'r hydref. Bydd hysbysebu digidol ar draws sianeli cyfryngau cymdeithasol fel Facebook, Instagram a Linkedin yn digwydd drwy gydol yr ymgyrch, yn ogystal â hysbysebu wedi'i dargedu mewn cydweithrediad ag archfarchnadoedd sy'n gwerthu Cig Oen Cymru ledled Cymru a Lloegr.
I gael gwybodaeth bellach am Gig Oen Cymru ac i weld ryseitiau diweddaraf HCC, dilynwch Gig Oen Cymru ar Facebook ac Instagram neu ewch i www.eatwelshlambandwelshbeef.com
