Mae Llywodraeth Cymru am benodi pedwar Cyfarwyddwr Anweithredol newydd i ymuno â bwrdd Hybu Cig Cymru (HCC).
Wedi’i gadeirio gan Catherine Smith, mae'r bwrdd yn cynnwys unigolion ag ystod o brofiadau o bob rhan o’r gadwyn gyflenwi cig coch. Mae gan yr aelodau sgiliau cryf ar draws y sector a phrofiad mewn llywodraethiant, amaethyddiaeth, cynaliadwyedd a marchnata.
Rôl Bwrdd HCC yw goruchwylio’r swyddogion gweithredol a darparu arweinyddiaeth effeithiol. Mae’n diffinio a datblygu cyfeiriad strategol a gosod amcanion heriol, tra’n hyrwyddo safonau uchel o gyllid cyhoeddus, cynnal egwyddorion rheoleidd-dra, priodoldeb a gwerth am arian. Mae'r Bwrdd yn gyfrifol am fonitro perfformiad HCC, gan sicrhau ei fod yn bodloni'r nodau, amcanion a thargedau perfformiad a nodir yn y cynlluniau corfforaethol a busnes.
Meddai Catherine Smith: “Bydd HCC yn lansio Gweledigaeth 2030 yn fuan - cynllun strategol newydd ar gyfer y pedair blynedd nesaf - felly dyma amser gwych i ymuno â’r Bwrdd ar ddechrau pennod newydd, gyffrous. Os ydych chi’n awyddus i wneud gwahaniaeth, yn angerddol am sector cig coch Cymru ac eisiau helpu i siapio’i ddyfodol, dyma gyfle perffaith i chi.”
Y dyddiad cau ar gyfer ceisiadau yw 16:00 ar 23/01/2026.
Am fwy o wybodaeth a manylion ymgeisio, cliciwch ar y dolenni canlynol:
Dau Aelod Anweithredol o'r Bwrdd - Bwrdd Hybu Cig Cymru - Cymraeg yn Ddymunol -
Dau Aelod Anweithredol o'r Bwrdd - Bwrdd Hybu Cig Cymru - Cymraeg yn Hanfodol -
