Mae wyth ymgeisydd llwyddiannus wedi’u dewis fel aelodau cynllun Cig-weithio Hybu Cig Cymru (HCC) ar gyfer 2025-2026.
Gan gyfarfod am y tro cyntaf yn Sioe Frenhinol Cymru yr wythnos ddiwethaf, dyma ail griw'r rhaglen sydd â’r nod o gysylltu unigolion ifanc sy’n gweithio ar draws y gadwyn gyflenwi cig coch.
Yr aelodau yw:
- Ben Roberts, Wrecsam – cigydd a pherchennog Astley & Stratton
- Bethany Rogers, Llanfair ym Muallt – caffael cig oen i gwmni Pilgrims
- Emma Williams, Ynys Môn - ffermwr a manwerthu o’r fferm
- Erin McNaught, Y Bala – ffermwr a llefarydd ar amaethyddiaeth
- Lynfa Jones, Y Trallwng – ysgrifennydd Cymdeithas Gwartheg Duon Cymru
- Rachel Jones, Y Drenewydd – darlithydd mewn Amaethyddiaeth yng Ngholeg y Drenewydd – Grŵp NPTC
- Richard Watkins, Malvern – caffael cig eidion i gwmni Kepak
- Thomas Davies, Aberaeron – masnachwr amaethyddol i gwmni Wynnstay
Datblygwyd y rhaglen yma i unigolion rhwng 21-35 mlwydd oed. Mae’n cynnwys pum sesiwn gyda thema wahanol sy’n gyfle i’r grŵp ddod ynghyd i ddatblygu eu gwybodaeth a’u dealltwriaeth o rannau gwahanol o’r gadwyn gyflenwi, yn amrywio o ddulliau amaethu ac iechyd anifeiliaid, i ansawdd bwyta a thueddiadau defnyddwyr.
Bydd pob aelod yn cael mentor o’r diwydiant a bydd disgwyl iddynt dreulio diwrnod gyda’r mentor yn y gweithle. Yn ogystal, bydd y grŵp yn cydweithio ar brosiect ymchwil a bydd y canlyniadau’n cael eu bwydo yn ôl i’r diwydiant.
Meddai Uwch Swyddog Cynhyrchu a Phrosesu HCC, Lowri Thomas: “Llwyddodd y cynllun Cig-weithio i gysylltu unigolion ac ysgogi trafodaeth ymysg aelodau o’r gadwyn gyflenwi yn y flwyddyn gyntaf. Byddwn yn adeiladu ar lwyddiant y flwyddyn gyntaf i ddatblygu rhaglen bwrpasol i’r grŵp newydd, gan ddatblygu eu dealltwriaeth o gynhyrchu cig coch o’r fferm i’r fforc.
“Cawsom ein plesio gan yr ymgeiswyr a’u profiadau amrywiol o’r diwydiant cig coch. Edrychwn ymlaen at weithio gyda chriw deinamig o bobl sy’n cynnwys cynrychiolwyr o fanwerthwyr, proseswyr a chwmni masnachu amaethyddol, ffermwyr a mwy.”
Er na fagwyd Thomas Davies ar fferm, mae’r diddordeb mewn amaethyddiaeth a chynhyrchu cig coch wedi bod yno erioed. Meddai: “Mae fy nghefndir mewn ffermio; roeddwn i’n arfer helpu mam-gu a tad-cu ar eu fferm nhw o oedran ifanc. Yn dilyn hynny, es i i astudio amaethyddiaeth ar gyfer fy ngradd a gradd meistr. Nawr, rwy’n awyddus i ddysgu mwy gan aelodau eraill Cig-weithio ac ehangu fy mhrofiad o fewn y sector cig coch.”
Roedd gan Ben Roberts hefyd ddiddordeb yn y sector cig coch o oedran ifanc a dechreuodd hynny pan oedd yn un ar ddeg mlwydd oed pan arferai helpu mewn siop cigydd. “O helpu yn siop tad fy ffrind gorau, mi ges i swydd ar ddydd Sadwrn gyda chigydd. Bryd hynny, doedd gen i ddim diddordeb mewn gyrfa fel cigydd a dewisais ddilyn trywydd cynllunio graffeg yn y coleg. Sylweddolais yn sydyn nad oedd hynny i mi felly mi es i yn ôl at y cigydd i ofyn am swydd. Dw i ddim wedi edrych yn ôl ac yn berchennog ar fy musnes fy hun erbyn hyn yn Farndon, Sir Caer.
“Roeddwn i’n falch o gael fy newis ar gyfer Cig-weithio ac yn awyddus i ddysgu mwy am y gwahanol agweddau o’r gadwyn gyflenwi cig coch.”
