Yn dilyn proses recriwtio drwyadl, mae José Peralta wedi’i gyhoeddi fel Prif Weithredwr newydd y corff ardoll cig coch, Hybu Cig Cymru (HCC).
Mae gan José brofiad helaeth o weithio ar lefel Rheolwr Gyfarwyddwr yn niwydiant cig y DU ers dros 25 mlynedd.
Mae ei swyddi blaenorol yn cynnwys gweithio fel Rheolwr Gyfarwyddwr i fusnes cig coch mwyaf ond un y DU dan berchnogaeth Grampian Country Food Group, Vion, a 2 Sisters Food Group. Dan ei arweiniad, roedd gan y sefydliad werthiant blynyddol o dros £500 miliwn, dros 3,000 o weithwyr, chwe safle prosesu dros y DU ac roedd yn un o brif werthwyr cig eidion ac oen yn y DU a thramor tan 2016.
Yn ddiweddarach yn ei yrfa, José oedd Rheolwr Gyfarwyddwr Tulip Food Company. Yn y swydd hon, roedd yn gyfrifol am wyth safle prosesu a gwerthiant blynyddol o dros £500 miliwn o gynnyrch porc gyda gwerth ychwanegol.
Ei swydd ddiweddaraf oedd Prif Swyddog Gweithredol i Puffin Produce yn Sir Benfro, ble’r oedd, ymysg dyletswyddau eraill, yn arwain datblygiad safle poteli llaeth Hufenfa Sir Benfro.
Meddai Cadeirydd HCC, Catherine Smith:
“Mae Bwrdd Hybu Cig Cymru yn edrych ymlaen at weithio gyda José, ac yn hyderus y bydd ei sgiliau arwain eithriadol, a’i brofiad helaeth yn y diwydiant cig coch yn ei wneud yn ymgeisydd delfrydol i arwain HCC, yn y cyfnod nesaf o’i ddatblygiad o fewn diwydiant deinamig sy’n esblygu, wrth barhau i osod ein talwyr ardoll wrth wraidd popeth a wnawn.
“Dyma gyfnod cyffrous i ymuno â’r sefydliad, wrth i ni barhau i dyfu a chryfhau ein brandiau adnabyddus, Cig Oen Cymru PGI a Chig Eidion Cymru PGI. Wrth i ni ddod a’r gwaith o weithio ar ein cynllun busnes pum-mlynedd presennol i ben, a dechrau siapio ein gweledigaeth strategol ar gyfer 2026 a thu hwnt, rydym ni’n ymrwymo i greu rhaglen fapio a fydd yn cefnogi twf cynaliadwy'r diwydiant fel rhan hanfodol o economi bwyd-amaeth Cymru.
“Fe hoffem ni hefyd ddiolch i Heather Anstey-Myers, Prif Weithredwr Dros Dro am ei holl waith caled dros y flwyddyn ddiwethaf.”
Mae Hybu Cig Cymru yn gorff hyd-braich o Lywodraeth Cymru, ac meddai’r Dirprwy Brif Weinidog sydd â chyfrifoldeb dros Newid Hinsawdd a Materion Gwledig, Huw Irranca-Davies:
“Rwy’n falch bod José Peralta yn ymgymryd â’r swydd bwysig hon. Gyda chefndir cryf yn y diwydiant cig coch, bydd ei brofiad yn amhrisiadwy i symud y sefydliad yn ei flaen, gan wneud yn fawr o bob cyfle ar ran talwyr ardoll a’r diwydiant bwyd-amaeth yn ehangach. Rwy’n hyderus y bydd Hybu Cig Cymru yn parhau â’r rol ganolog o weithio gyda Llywodraeth Cymru a rhanddeiliaid i ddarparu dyfodol cynaliadwy i ffermwyr ym mhob rhan o Gymru.”
Gan ystyried ei benodiad, meddai José Peralta:
“Rwy’n edrych ymlaen at gychwyn ar y gwaith yn syth gyda thîm HCC i sicrhau bod y sefydliad yn sefyll gyda’i bartneriaid fel llais cryf i ddiwydiant cig coch Cymru, gan gefnogi ei ddatblygiad a’i hyrwyddo ar ran ein talwyr ardoll.
“Dros yr wythnosau a’r misoedd nesaf, byddaf yn ymgysylltu gyda thalwyr ardoll a phartneriaid ehangach, i ganfod cyfleoedd ar gyfer cydweithio a phartneriaeth er mwyn gwneud y gorau dros ein talwyr ardoll a’r diwydiant yn ehangach.”
Bydd José Peralta yn dechrau yn ei swydd newydd ar 20 Ionawr 2025.
