Bydd cynnydd o 4.2% yn yr ardoll a delir gan gynhyrchwyr a lladd-dai yng Nghymru yn sicrhau dyfodol cynaliadwy i sector cig coch Cymru. Defnyddir yr ardoll gan Hybu Cig Cymru (HCC) i ariannu gweithgareddau i gefnogi datblygiad diwydiant cig coch Cymru (defaid, gwartheg a moch), a hwnnw’n waith na fyddai’n cael ei wneud dan amodau arferol y farchnad.
Cafodd cyfraddau Ardoll Cig Coch Cymru eu cynyddu ym mis Ebrill 2023 yn dilyn trafodaeth gyda’r diwydiant. Cyflwynwyd mecanwaith i gysylltu cynnydd mewn ardoll yn y dyfodol i’r Mynegai Prisiau Defnyddwyr yn cynnwys costau tai perchnogion a phreswylwyr (CPIH).
“Doedd y mecanwaith ddim yn cynnwys cynnydd blynyddol awtomatig ond roedd yn caniatáu i Fwrdd HCC argymell ei gynyddu i’r Gweinidog, yn seiliedig ar CPIH y flwyddyn galendr flaenorol.
“Cyn 2023, bu cyfraddau Ardoll Cig Coch Cymru yn statig am 12 mlynedd (ers 2011) a gwelwyd cynnydd cyn hynny yn 2001 (10 mlynedd yng nghynt) ac yn 1996. Roedd y cynnydd mewn cyfraddau ardoll yn y gorffennol yn gynnydd untro a gytunwyd gan y diwydiant i adlewyrchu newidiadau chwyddiannol dros y blynyddoedd blaenorol. Yn 2011, gwnaed cynnydd o 24 y cant i’r cyfraddau,” eglurodd Gareth Jones, Pennaeth Cyllid a Llywodraethiant Corfforaethol HCC.
Cyn 2023, roedd HCC yn cynyddu’r incwm o’r lefi gydag incwm grant ychwanegol, ac ers Ebrill 2021 mae’r Cynllun Ailddosbarthu Ardoll Cig Coch wedi bod ar waith, gyda Chymru’n elwa o’r ailddosbarthiad o ardoll erbyn hyn.
Ychwanegodd Mr Jones: “Roedd y penderfyniad i gysylltu cyfraddau ardoll i chwyddiant blynyddol yn 2023, gan ddefnyddio “tracker”, yn sicrhau bod yr incwm ardoll yn cael ei gynnal ac yn aros ar lefel na fyddai’n effeithio ar y gallu i wario.”
Ychwanegodd Laura Pickup, Pennaeth Marchnata Strategol a Chysylltiadau HCC: “O ystyried hyd a lled yr heriau sy’n wynebu diwydiant cig coch Cymru, mae’n hanfodol bod gan y diwydiant gorff ardoll sydd wedi’i ariannu’n ddigonol i ymgymryd â gwaith datblygu, hyrwyddo a marchnata cig coch Cymru, yn y wlad yma a thramor.
“Drwy gynyddu’r ardoll fel hyn, byddwn yn cynnal y momentwm sy’n bodoli eisoes ac mae’n cyd-fynd â disgwyliadau ein talwyr ardoll a’r amcanion a gytunwyd arnynt yng Nghynllyn Busnes 2022-2026 HCC.”
