Bydd gweminar i’r diwydiant yn cyflwyno manteision gwelliannau geneteg i fusnesau ffermio, ac mae cynhyrchwyr o bob cwr o’r DU yn cael eu hannog i gofrestru ar ei gyfer.
Wedi’i drefnu gan Hybu Cig Cymru (HCC) a chwmni Signet Breeding Services, bydd y weminar yn tynnu sylw at ganlyniadau arwyddocaol prosiectau yn cynnwys RamCompare, prawf epil cenedlaethol y DU. Yn ogystal, bydd cyngor ymarferol yn cael ei ddarparu gan reolwr gwasanaethau bridio defaid Signet, Sam Boon ar sut i ddewis y defaid cywir ar gyfer eich diadell.
Fe’i cynhelir nos Iau 4 Medi am 7:30yh, a bydd y digwyddiad ar-lein yn gyfle i ystyried sut y gellir defnyddio geneteg a genomeg defaid i fynd i’r afael â heriau ar ffermydd a thargedau amgylcheddol.
Yn ogystal â Sam Boon, bydd Dr Heather McCalamn o HCC yn cyflwyno yn ystod y weminar. Meddai: “Mae HCC wedi bod yn bartner yn y prosiect hir dymor RamCompare sydd wedi cynhyrchu canlyniadau gwerthfawr i helpu i gefnogi a hysbysu’r sector ddefaid yng Nghymru, a gyrru gwelliannau geneteg ymlaen. Mae’r gwaith wedi arddangos y gwerth o ddefnyddio hyrddod gyda’u perfformiad wedi’u cofnodi o’r 10% uchaf mewn diadelloedd masnachol ac yn galluogi ffermwyr i ddewis hyrddod terfynol yn hyderus.
“Nid gweminar ar gyfer Cymry yn unig yw hwn, rydym ni’n awyddus i weld ffermwyr o bob cwr o’r wlad yn ymuno ar y noson i glywed mwy am sut y gall y wybodaeth yma gael ei ddefnyddio mewn ffyrdd ymarferol i helpu bridwyr defaid o safbwynt ariannol, cynhyrchiant ac amgylcheddol.”
Ychwanegodd: “Mae’r canfyddiadau yn help i ddatblygu’r diwydiant defaid ymhellach ond hefyd yn ein galluogi i weithio tuag at Sero Net gyda’n gilydd. Yn ogystal, gall y datblygiadau greu tystiolaeth sy’n ein helpu i ategu negeseuon i hyrwyddo ein brandiau Cig Oen Cymru a Chig Eidion Cymru.”
I gofrestru a derbyn y ddolen i’r weminar, cysylltwch â HCC ar 01970 625050 / info@hybucig.cymru erbyn dydd Mercher 3 Medi 2025.
