Cafodd y data gwybodaeth diweddaraf am y farchnad cig coch, rhagofynion y farchnad ac ymgyrch gyfredol Cig Oen Cymru PGI eu trafod mewn weminar yn ddiweddar gan arbenigwyr Hybu Cig Cymru (HCC) yn eu gwahanol feysydd, sef Glesni Philips, Philippa Gill, a James Ruggeri.
Roedd cyfle gan y rhai a ymunodd â’r weminar i glywed Swyddog Gweithredol Gwybodaeth, Dadansoddi a Mewnwelediad Busnes HCC, Glesni Phillips, yn amlinellu’r tueddiadau a welir yn y farchnad gig oen ar hyn o bryd. Bu Philippa Gill, Swyddog Gweithredol Ymgyrchoedd HCC, yn trafod yr ymgyrch gyfredol ar gyfer Cig Oen Cymru, a gafodd ei lansio yn Sioe Frenhinol Cymru ym mis Gorffennaf, a bu James Ruggeri, Swyddog Gweithredol Datblygu’r Diwydiant yn HCC, yn esbonio sut i ateb gofynion y farchnad.
Rhoddodd Glesni adroddiad treiddgar am y tueddiadau diweddaraf sy’n dylanwadu ar y farchnad gig oen. Yn ogystal, bu’n archwilio i argaeledd cyfredol cig oen, sut mae lefelau cynhyrchu yn amrywio a beth mae hyn yn ei olygu i’r cyflenwad. Hefyd, bu’n dadansoddi’r marchnadoedd gartref a thramor, gan ystyried yr hyn y gallai’r tueddiadau diweddaraf olygu i ddyfodol cig oen Cymru yn y farchnad fyd-eang.
Wrth siarad ar ôl y gweminar, dywedodd Glesni: “Gyda dewisiadau defnyddwyr yn newid, mae deall y newidiadau yn y galw yn y siopau yn bwysicach nag erioed. Roedd deinameg y farchnad fyd-eang hefyd yn elfen bwysig o’r hyn a gafodd sylw gennym, ac rwy’n gobeithio fod hyn wedi rhoi darlun ehangach i dalwyr ardoll ynghylch sefyllfa Cig Oen Cymru yn y farchnad ryngwladol.
“Wrth i ni ddelio â thirwedd sy'n newid yn gyflym, mae deall faint o ŵyn a chig oen sydd ar gael, ynghyd â’r hyn sydd ei angen ar y defnyddiwr, yn hanfodol ar gyfer gwneud penderfyniadau gwybodus sy'n cael effaith ar broffidioldeb eich fferm. Roedd y sesiwn hon yn ymwneud â darparu'r wybodaeth sydd ei hangen i ymaddasu a ffynnu mewn marchnad gystadleuol. I ffermwyr ledled Cymru, mae cael yr wybodaeth ddiweddaraf am y tueddiadau hyn yn hanfodol ar gyfer cynllunio, strategaeth, a gwneud penderfyniadau mwy gwybodus ar gyfer yr hyn sy’n digwydd ar y fferm.”
Trafododd Philippa Gill yr ymgyrch i hyrwyddo Cig Oen Cymru PGI ar sianeli teledu ITV, Sky ac S4C ar hyn o bryd ac amlinellodd agweddau eraill ar yr ymgyrch eleni – gan gynnwys, hysbysebu allan o’r cartref, hysbysebion print yng nghylchgrawn Taste Blas a hysbysebu digidol ar draws y cyfryngau cymdeithasol. Esboniodd fod yr ymgyrch yn targedu siopwyr yng Nghymru a De Ddwyrain Lloegr ac yn canolbwyntio ar ardaloedd lle mae Cig Oen Cymru ar gael yn y cyffiniau i siopwyr.
Dywedodd: “Roedd yn wych gallu siarad am y gwaith rydym yn ei wneud yn HCC a’r gweithgaredd ymgyrchu sy’n cefnogi ein cynnyrch premiwm. Gallu dangos y strategaeth sy’n digwydd y tu ôl i’r llenni i sicrhau ein bod yn targedu’r gynulleidfa gywir ac yna defnyddio’r tactegau cywir i sicrhau bod strategaeth farchnata tymor hir a byr yn fuddiol i’n talwyr ardoll.”
Bu James Ruggeri yn trafod sut orau y gall ffermwyr ledled Cymru fodloni gofynion y farchnad er mwyn sicrhau’r enillion gorau a gwella ansawdd cig i’r defnyddiwr. Bu hefyd yn trafod y costau cynhyrchu cyfredol i gynhyrchwyr defaid ac yn tynnu sylw at gyfleoedd i ddatblygu’r diwydiant drwy’r cyrsiau hyfforddi Byw i Farw gyda HCC.
Dywedodd: “Mae Cig Oen Cymru PGI yn gynnyrch rhagorol, ond mae’n bwysig i ffermwyr Cymru barhau i greu cynnyrch y mae cwsmeriaid yn dymuno ei gael a gwybod y ffordd orau o ateb eu gofynion, cael yr enillion gorau, a gwella ansawdd y cig i'r defnyddiwr.
“Mae HCC bob amser wrth law i ddarparu’r wybodaeth sydd ei hangen i wneud penderfyniadau strategol ar gyfer llwyddiant y fferm yn y dyfodol ac os oes gennych ddiddordeb mewn ymuno ag un o’n cyrsiau byw-i-marw, cofiwch gysylltu â ni.”
