Roedd 2025 yn flwyddyn gynhyrchiol o weithgaredd cyffrous i’r brand Porc Blasus, wedi’i gydlynu gan Hybu Cig Cymru (HCC) ar ran cynhyrchwyr porc o Gymru. Roedd y gweithgareddau marchnata yn canolbwyntio ar greu cynnwys ffres, o ansawdd uchel i arddangos y cynnyrch a chefnogi’r rhwydwaith o gynhyrchwyr ymroddgar.
Yn ystod misoedd yr haf, datblygwyd 12 o rysetiau porc newydd sbon, oedd yn tynnu sylw at amlbwrpasedd y toriadau amrywiol. Cynlluniwyd y rysetiau yma i ysbrydoli defnyddwyr ac arddangos ansawdd eithriadol porc o Gymru, o ffefrynnau traddodiadol i flasau arloesol.
Yn ogystal, cefnogodd HCC Gystadleuaeth Prif Gynhyrchwr Porc CFfI Cymru drwy gynnal diwrnod rhyngweithiol gyda Chigyddion Dewi James yn Aberteifi. Cafodd ffermwyr ifanc y cyfle i gymryd rhan mewn arddangosfa bwtsiera ymarferol, dysgu sut i dorri carcas cyfan yn doriadau unigol a deall y ffordd orau o ddefnyddio pob un. Bydd y wybodaeth ymarferol yma yn eu helpu i wneud penderfyniadau ar sut i farchnata a defnyddio’u moch yn y dyfodol.
Daeth y diwrnod i ben gydag arddangosfa goginio byw gan Elwen Roberts, Swyddog Gweithredol y Defnyddwyr yn HCC, a ddangosodd amlbwrpasedd porc ac ysbrydoli’r criw gyda syniadau creadigol i fynd yn ôl i’w busnesau.
Cydweithiodd HCC hefyd ar astudiaeth achos newydd gyda Moch Coch, busnes sy’n arbenigo mewn cigoedd a salami cartref sydd wedi ennill gwobrau. Mae Moch Coch yn defnyddio dulliau traddodiadol i sychu eu cynnyrch mewn aer yn araf dros sawl mis. Cafodd eu hymrwymiad i ansawdd ei gydnabod yng ngwobrau Great Taste 2024, ble derbyniodd eu chorizo wobr 3-seren, yr acolâd uchaf a wobrywir gan y Guild of Fine Food. Bydd yr astudiaeth achos yma’n cael ei ddefnyddio ar sianelau cyfryngau cymdeithasol Porc Blasus a sianelau marchnata eraill, yn ogystal ag ar y wefan, a gallwch glicio yma i'w ddarllen.
Meddai Pip Gill, Arweinydd Ymgysylltu Brand HCC: “Mae Cymru’n cael ei chysylltu gyda Chig Oen Cymru a Chig Eidion Cymru, ond ni ddylen ni anghofio’r porc sy’n cael ei gynhyrchu’n lleol – neu Porc Blasus, fel yr hoffwn ni ei alw. Er bod y sector porc yng Nghymru ar raddfa fach, mae’n arbenigol.
“Fe wnaethon ni fwynhau gweithio gyda Moch Coch, yn ogystal â chydweithio gyda’r cynhyrchwyr ifanc yng nghystadleuaeth moch y CFfI. Roedd yr adborth a dderbyniwyd ganddynt yn gadarnhaol, gyda nifer yn frwdfrydig i roi eu gwybodaeth newydd ar waith yn eu mentrau eu hunain.
“Gan edrych ymlaen i 2026, mi fyddwn ni’n datblygu llyfrynnau i’n cynhyrchwyr fel y gallant eu defnyddio yn eu cynlluniau bocs neu eu rhannu’n uniongyrchol gyda defnyddwyr, gan helpu i gryfhau’r cysylltiad rhwng y fferm a’r bwrdd. Byddant yn cynnwys manylion am Porc Blasus, proffiliau cynhyrchwyr a chasgliad o rysetiau blasus.”
Am ganllaw toriadau porc a chyfeiriadur o gynhyrchwyr, ewch i wefan Porc Blasus: Porc Blasus
