Mae’r siop gig Prendergast, yn Hwlffordd wedi cipio'r wobr gyntaf am selsig gorau Cymru yn y gystadleuaeth uchel ei pharch, ’Cyflwynwch Eich Selsig Gorau 2024’.
Mae’r gystadleuaeth yn cael ei threfnu gan Hybu Cig Cymru, ac mae hi’n dathlu'r diwydiant porc artisan Cymreig, sef diwydiant o ffermydd bychan a chynhyrchwyr arbenigol.
Chris a Rachel Wolsey, ynghyd â’u dau fab Tom a Mark sy’n rhedeg y siop gig deuluol yn yr Hwlffordd.
Mae’r teulu yn ffermio yn Sir Benfro ers bron i hanner canrif, a saith mlynedd yn ôl penderfynon nhw gymryd yr awenau mewn siop gig leol. Dros y saith mlynedd ddiwethaf, mae’r busnes wedi ei drawsnewid, ac mae’r teulu yn ennill gwobrau cyson am safon eu cynnyrch. Mae’r gwobrau hyn yn cynnwys cael eu henwi’n Siop Gig Orau Cymru yng Ngwobrau Siop Gig y Flwyddyn, digwyddiad sy’n rhoi sylw i siopau cig ledled y DU.
Mewn digwyddiad yn Ffair Aeaf y Sioe Frenhinol dyfarnwyd y wobr gyntaf i Merry Cherry, selsig Nadoligaidd Prendergast, yn y categori newydd sy’n gwobrwyo'r Selsig Nadoligaidd Gorau. Mae hyn ar ben ennill y brif wobr am selsig gorau Cymru.
Wrth ymateb i ennill y ddwy wobr, dywedodd Chris Wolsey, “Rwyf i mor falch ein bod ni wedi mynd â hi o’r diwedd! Roeddem ni ar y rhestr fer ac yn agos iawn at y brig y llynedd a’r flwyddyn cyn hynny! Mae ennill y wobr am y Selsig Nadoligaidd Gorau yn goron ar y cyfan.
“Mae pawb yn y siop wrth eu bodd. Cyn cystadlu, bu’n rhaid i’r teulu dreialu a blasu’r selsig droeon, er mwyn cyrraedd pwynt ble’r oeddem ni’n hyderus y byddai ein cwsmeriaid yn eu mwynhau. Rwyf i’n hoffi selsig gyda llawer iawn iawn o borc, ac ychydig iawn o berlysiau a sbeisys, sydd wedi eu cymysgu â llaw a’u gorchuddio'r selsig â chas naturiol. Wrth ddefnyddio cynnyrch mor arbennig â phorc wedi ei fagu’n lleol, fy nheimlad i yw y dylen ni adael i’r porc serennu gan sicrhau mai dyna yw prif flas y selsig.”
“Rwy’n credu bod porc Cymru yn well na phorc yr un man arall. Mae’r blas, a’r ffordd rydym ni’n magu’r cig ar ffermydd bychan yn ein gwneud ni’n wahanol i’r ffermydd mawr sy’n ffermio’n fwy diwydiannol. Rydym ni’n gwybod o ble mae holl gig y siop yn dod, mae posib olrhain pob peth yno. Rydym ni’n gweithio’n agos â’n cwsmeriaid a’r ffermwyr i sicrhau bod y cynnyrch yn cyrraedd y safon uchaf bosib.”
Dywedodd Philippa Gill, Arweinydd Ymgysylltu Hybu Cig Cymru , “Rydym ni’n falch iawn o lwyddiant Siop Gig Prendergast wrth iddyn nhw gipio dwy wobr yn y gystadleuaeth eleni.”
“Mae safon y gystadleuaeth yn uchel, ac yn dangos y math o gynnyrch artisan safonol sydd ar gael yn lleol i bobl Cymru.”
“Mae ein cynhyrchwyr bychan yn cynnig cynnyrch unigryw sydd wedi eu creu â llaw mewn siopau fel Siop Gig Prendergast. Nid yw’r cynnyrch hwn wedi teithio ymhell, ac felly mae’n ddewis cynaliadwy sy’n cadw arian yn yr economi leol. Rydym ni’n annog pobl i roi cyfle i’w cynhyrchydd porc lleol.”
I gael rhagor o wybodaeth am borc sydd wedi ei gynhyrchu yng Nghymru, a manylion am ble i’w brynu ewch i wefan porcblasus.cymru.
