Bydd corff ardoll cig coch Cymru, Hybu Cig Cymru (HCC), yn mynychu sioe fasnach enwog Gulfood a gynhelir yn Dubai rhwng 26-30 Ionawr i hyrwyddo Cig Oen Cymru PGI i gynulleidfa fyd-eang.
Bydd gan HCC bresenoldeb yn Neuadd Gig Gulfood yn ogystal ag ar stondin Llywodraeth Cymru yn y Pafiliwn Rhyngwladol - gan sicrhau presenoldeb cryf ar draws y digwyddiad. Yn ogystal, mae HCC yn noddi Gwobrau Bwyd Da (Good Food Awards) y BBC, sy'n digwydd cyn Gulfood, i hyrwyddo Cig Oen Cymru PGI i bobl oddi mewn i’r diwydiant bwyd, prynwyr a chynrychiolwyr o'r diwydiant a’r sector lletygarwch. Yn ystod gweithgareddau’r gwobrau, bydd Cig Oen Cymru PGI yn cael ei goginio a'i weini gan y cogydd Russell Impiazzi.
Mae marchnadoedd y dwyrain canol yn dal i fod yn darged i allforwyr cig coch Cymru. Mae galw mawr am gynhyrchion cig oen yn y gwledydd hyn, lle mae nifer yr alltudion o'r DG ar gynnydd.
Gulfood yw un o sioeau masnach bwyd a diod mwyaf y byd ac mae'n cynnwys dros 8,500 o arddangoswyr o dros 130 o wledydd. Mae’r sioe eleni wedi'i rhannu dros ddau safle, gyda'r Pafiliwn Cig wedi ei leoli yng Nghanolfan Masnach y Byd Dubai a'r Pafiliwn Rhyngwladol wedi ei osod yn Expo Dubai. Bydd gan HCC bresenoldeb yn y ddau leoliad drwy gydol y sioe.
Dywedodd Arweinydd Datblygu Marchnad HCC, Jason Craig: “Bydd HCC yn dychwelyd i Gulfood yn 2026 i roi allforwyr Cymru mewn cysylltiad â phrynwyr yn y rhanbarth. Gulfood yw prif sioe fasnach bwyd a diod y Dwyrain Canol ac mae'n gyfle unigryw i gyfarfod â mewnforwyr, prynwyr, perchnogion tai bwyta a chynrychiolwyr busnes yn y rhanbarth.”
“Os hoffech ddod i gwrdd â ni i fwynhau blas Cig Oen Cymru PGI a dysgu mwy am yr hyn y gall HCC ac allforwyr Cymru ei gynnig, dewch i'n stondin SL2 yng Nghanolfan Masnach y Byd Dubai.”
