HCC yn Sioe Frenhinol Cymru

O ymgynghori gyda’r diwydiant i goginio gyda defnyddwyr, bydd gan Hybu Cig Cymru (HCC) raglen brysur o ddigwyddiadau yn Sioe Frenhinol Cymru eleni (dydd Llun 21 – dydd Iau 24 Gorffennaf 2025).

Bydd presenoldeb HCC yn rhan bwysig o’r gwaith ymgysylltu ar Gweledigaeth 2030 - dogfen strategol bwysig sy’n gosod cyfeiriad y sefydliad ac yn cadarnhau ei flaenoriaethau ar gyfer cefnogi’r diwydiant dros y pedair blynedd nesaf.

Mae holiadur ar-lein ar agor ers canol Mehefin, sy’n cynnig cyfle i gynhyrchwyr sy’n talu ardoll i rannu eu barn ar yr heriau a chyfleoedd i’r dyfodol. Bydd yr holiadur yma ar gael i’w gwblhau ar stondin HCC yn y Sioe, neu gall rhanddeiliaid fynychu’r sesiynau galw heibio anffurfiol neu drefnu cyfarfod gyda staff HCC i gyfrannu at y broses a helpu i siapio dyfodol y diwydiant cig coch.

Bydd sylw i Gweledigaeth 2030 yn ystod Brecwast HCC hefyd. Fe’i cynhelir ar fore cyntaf y Sioe, gyda Chadeirydd HCC Catherine Smith a Huw Irranca-Davies AS, Y Dirprwy Brif Weinidog ac Ysgrifennydd y Cabinet dros Newid Hinsawdd a Materion Gwledig.

Cyhoeddir aelodau ail griw cynllun Cig-weithio HCC, yn ogystal ag enillydd Ysgoloriaeth HCC 2025. Nod y cynlluniau yma yw gweithio gydag unigolion blaengar ac uchelgeisiol o fewn sector cig coch Cymru sy’n awyddus i ddatblygu eu hunain a datblygu’r diwydiant i’r dyfodol.

Bydd Swyddog Gweithredol y Defnyddwyr yn HCC, Elwen Roberts yn cyflwyno nifer o arddangosiadau coginio, yn cynnwys un ar ‘gigoedd coll’ megis afu oen. Bydd hyn yn tynnu sylw at waith HCC fel rhan o brosiect ‘SMART Maeth Cymru’ sy’n golygu gweithio gyda phartneriaid yn y diwydiant i ddarganfod ffyrdd newydd o wneud y mwyaf o faetholynnau gwerthfawr a lleihau colledion ar hyd y gadwyn gyflenwi.

Edrychwn ymlaen at groesawu ymwelwyr adnabyddus i’r gegin. Bydd y rhain yn cynnwys ein Llysgennad Brand newydd a’r chwaraewr rygbi, Jonathan ‘Fox’ Davies; yr athletwraig Olympaidd, Adele Nicholl; y garddwr ar S4C, Adam yn yr Ardd; y canwr a’r diddanwr, y Welsh Whisperer; a’r cymeriad teledu i blant, Hywel y Ffermwr.

Mae gan Gymru nifer o gynnyrch sydd â statws PGI/PDO, sydd wrth gwrs yn cynnwys Cig Oen Cymru a Chig Eidion Cymru. Bydd cynhyrchwyr bwydydd PGI/PDO yn ymweld â stondin HCC i drafod a blasu’r cynnyrch yma a’u nodweddion arbennig.

Meddai Swyddog Gweithredol Digwyddiadau HCC, Medi Jones-Jackson: “Rydym yn edrych ymlaen at amser prysur a chynhyrchiol yn Sioe Frenhinol Cymru, ac yn gyffrous i weld ein harddangosiadau coginio poblogaidd yn dychwelyd. Mae’n gyfle ffantastig i arddangos cynnyrch cig coch premiwm y diwydiant ac ysbrydoli pobl i goginio, gyda help ambell wyneb cyfarwydd!

“Rydym yn awyddus i weld talwyr ardoll yn ymweld â’n stondin hefyd – sydd wedi’i lleoli yn yr un safle ag arfer, rhwng y neuadd fwyd a’r ganolfan gneifio – a chefnogi datblygiad Gweledigaeth 2030 drwy rannu eich barn a’ch syniadau ar gyfer y diwydiant. Mae eich barn yn cyfri felly cofiwch ddod i’w leisio ar ein stondin. Bydd croeso cynnes yn aros amdanoch.”

Mae’r gweithgareddau canlynol wedi’u trefnu (gall yr union amseroedd newid). Mae croeso cynnes i aelodau o’r wasg a’r cyfryngau, cysylltwch gyda swyddfa’r wasg HCC i gadarnhau eich presenoldeb, i drefnu cyfweliadau neu dynnu lluniau.

Dydd Llun 21 Gorffennaf 2025

Dydd Mawrth 22 Gorffennaf 2025

Dydd Mercher 23 Gorffennaf 2025

Dydd Iau 24 Gorffennaf 2025