Teithiodd tîm Hybu Cig Cymru (HCC) ar hyd a lled Cymru yn ystod mis Medi i ymgysylltu mewn trafodaethau buddiol gyda rhanddeiliaid y sector cig coch.
Bu’r staff yn ymweld â deg arwerthiant da byw a mynychwyd wyth digwyddiad ‘Ein Ffermydd’ Cyswllt Ffermio i hyrwyddo ymrwymiad HCC i gydweithio ac i siarad am y gwaith sy’n cael ei wneud ar ran y sector cig coch – o’r ymgyrchoedd marchnata i weithgaredd ymchwil a datblygu.
Roedd hefyd yn gyfle i annog ffermwyr defaid a chig eidion i gymryd rhan yn y prosiectau, astudiaethau a’r digwyddiadau diweddaraf yn cynnwys yr Arolwg o Fwriadau Ffermwyr, prosiect ARFOR ar Ddatgarboneiddio Cig Eidion a gweminar HCC ar wybodaeth y farchnad, gofynion y farchnad ac ymgyrchoedd marchnata cyfredol.
Meddai James Ruggeri, Swyddog Gweithredol Datblygu’r Diwydiant yn HCC: “Yn ogystal â marchnata brandiau eiconig Cig Oen Cymru a Chig Eidion Cymru, mae HCC yn gweithio i ddatblygu’r diwydiant ac i sicrhau bod diwydiant cig coch Cymru yn gweithio tuag at wella ansawdd, cynyddu cost-effeithiolrwydd ac ychwanegu gwerth at gynhyrchion cig coch Cymru ar draws y diwydiant.
“Mae ymweld â’r marchnadoedd a mynychu digwyddiadau i gynhyrchwyr yn gyfle da i sgwrsio gyda ffermwyr a rhannu gwybodaeth a mewnwelediad o’r diwydiant ar draws Cymru. Cawsom nifer fawr o sgyrsiau cadarnhaol ac ymateb gwych i’n Harolwg o Fwriadau Ffermwyr. Roedd yn braf cael siarad gyda chymaint o ffermwyr sy’n rhannu’r un angerdd am y diwydiant â ni.”
Bu’r tîm mewn marchnadoedd o’r Gaerwen i Drefynwy i Grymych, yn ogystal â mynychu Arwerthiant Hyrddod yr NSA yn Llanelwedd. Bu rhai o’r staff mewn digwyddiad gan brosesydd ar gyfer cynhyrchwyr, oedd yn cynnwys sgyrsiau, arddangosfa torri cig a barnu carcasau, a darparwyd hyfforddiant a sesiynau gwybodaeth i fyfyrwyr milfeddygol yn Aberystwyth.
Mae deugain o gynhyrchwyr wedi elwa o gyrsiau Hyfforddiant Dewis Da Byw HCC yn ddiweddar. Mae’r cwrs yn gyfle unigryw i raddio carcasau a thrafod gofynion y proseswyr gyda’r proseswyr eu hunain. Bydd mwy o sesiynau yn cael eu cynnal cyn diwedd y mis, mewn cydweithrediad â Cyswllt Ffermio. I wneud cais am gwrs neu fynychu sesiwn hyfforddi, gall cynhyrchwyr gysylltu â HCC ar: info@hybucig.cymru / 01970 625050
