Mae beibl blynyddol o ddata amaethyddol wedi’i gyhoeddi gan Hybu Cig Cymru (HCC).
O glawr i glawr, mae’r Llyfr Bach o Ffeithiau am Gig - Casgliad o Ystadegau’r Diwydiant Cig Coch a Da Byw yng Nghymru 2025, yn llawn ffigyrau cyffredinol am y diwydiant, gydag adran ar y sector gwartheg, defaid a moch.
Mae’n adrodd bod 37,000 o ddaliadau amaethyddol yng Nghymru yn 2024, yn gorchuddio arwynebedd tir o 1,775,000 hectar. Daliadau gwartheg a defaid (ardal llai ffafriol) oedd cyfran uchaf daliadau Cymru - 15.7% o’r cyfanswm - a phob un ag incwm fferm cyfartalog o £28,500 yn 2023/24.
Swyddog Gweithredol Gwybodaeth, Dadansoddi a Mewnwelediad Busnes HCC, Glesni Phillips oedd yn gyfrifol am grynhoi’r data ar gyfer y llyfryn. Meddai Glesni: “Mae’r llyfryn bach yn ddefnyddiol ar gyfer unrhyw un sy’n ymwneud ag amaethyddiaeth neu sydd â diddordeb mewn amaeth. Mae’n rhannu darlun cynhwysfawr o’r diwydiant, ac yn edrych yn fanylach ar y sectorau defaid, gwartheg a moch, eu lefelau cynhyrchu a thueddiadau defnyddwyr.
“O fewn y cloriau gallwch ddarganfod gwybodaeth ar niferoedd da byw, lefelau trwybwn, data allforio a mewnforio, prisiau’r farchnad, cyfeintiau’r mân-werthwyr a ffigyrau gwerthiant, ynghyd â phatrymau prynu cwsmeriaid - yr holl wybodaeth sydd ei angen arnoch am y diwydiant yma yng Nghymru.”
Mae copïau caled o’r llyfryn ar gael drwy gysylltu â HCC, neu gallwch ei lawrlwytho o wefan HCC.
