Mae cig coch, fel rhan o ddiet cytbwys ac iach, yn hanfodol – dyna’r neges allweddol gan gadeirydd Hybu Cig Cymru, Catherine Smith, ar drothwy Diwrnod Iechyd y Byd (dydd Sul 7 Ebrill 2024).
Mae’r diwrnod, sy’n cael ei arwain gan Sefydliad Iechyd y Byd (WHO), yn canolbwyntio eleni ar ‘Fy iechyd, fy hawl’ gan bwysleisio bod hawl miliynau o bobl ledled y byd i iechyd yn dod dan fygythiad cynyddol.
O’i fferm yn Sir Fynwy, mae Cadeirydd HCC, Catherine Smith, yn rhoi sylw i’r rhan sydd gan gig coch i’w chwarae mewn diet cytbwys: “Mae gan bobl ar draws y byd yr hawl i fwyd maethlon a chynaliadwy. Er bod anghenion maethol ein cyrff yn amrywio ac yn newid drwy gydol ein bywydau, mae'n hanfodol ein bod, drwy’r adeg, yn gofalu am ein cyrff er mwyn iechyd a hapusrwydd.
“Y ffordd symlaf o fyw yn iach yw bwyta amrywiaeth o wahanol fwydydd, ac mae cig coch yn un math o fwyd a all ein helpu i ddiwallu yr haearn, potasiwm, magnesiwm, sinc, Fitaminau B a Fitamin D drwy gydol ein hoes.”
Yn llawn dop o’r fitaminau a’r mwynau hanfodol hyn, gall diet cytbwys gyda chig coch heb lawer o fraster ein helpu i gadw’n heini ac iach, waeth beth yw ein hoed. Gall bwyta hyd at 500g o gig coch wedi'i goginio bob wythnos fod yn ganolog i ddiet iach a chytbwys.
“O’i fwyta yn y meintiau cywir, mae cynnwys cig coch yn eich diet yn dod â llawer o fanteision iechyd i bobl o bob oed, gan gynnwys haearn sy’n helpu i leihau blinder, fitaminau B sy’n cynhyrchu egni, a sinc sy’n helpu’r system imiwnedd i weithio’n normal,” ychwanegodd.
Mae cig coch hefyd yn cynnwys ffosfforws, sydd ei angen ar gyfer twf normal a datblygiad esgyrn plant, ac mae hefyd yn llawn protein. Mae’n ddelfrydol mewn pryd wedi’i dro-ffrio er enghraifft, ar ôl sesiwn yn y gampfa, i'ch helpu i ddadebru, i ddatblygu cyhyrau ac i deimlo'n llawn egni.
“Mae bwyta Cig Oen Cymru a Chig Eidion Cymru blasus fel rhan o ddiet iach a chytbwys yn ffordd ragorol o wneud yn siŵr eich bod yn cael yr hyn sydd ei angen arnoch ar gyfer iechyd da – fel y bwriadwyd gan natur,” ychwanegodd Catherine.
