Gwahoddir milfeddygon a ffermwyr defaid o bob cwr o Gymru i ymuno mewn gweminar addysgiadol ar sut i reoli defaid tenau a phryd i ymchwilio a thrin clefydau rhewfryn mewn diadelloedd.
Fe gynhelir y weminar - sy’n dwyn y teitl ‘Mynd i wraidd y broblem - rhesymau am ddefaid tenau mewn diadelloedd’ – ar nos Lun 17 Chwefror. Bydd y milfeddyg a’r ymgynghorydd defaid Kate Hovers yn egluro sut y gall ffermwyr defaid yng Nghymru elwa o ganfod y cyflyrau’n fuan.
Mae sawl ffactor sy’n gallu cyfrannu at ddefaid tenau sy’n perfformio’n sâl, a bydd darganfod gwraidd y broblem - sy’n gallu bod mor syml â bwydo annigonol, neu’n fwy difrifol fel clefyd rhewfryn drwg - yn helpu’r busnes.
Mae clefydau rhewfryn yn derm i ddisgrifio clefydau sy’n aml yn datblygu’n araf. Fel y mae’r enw’r awgrymu, gall difrifoldeb y clefyd fod yn waeth na’r disgwyl gyda mwy o anifeiliaid yn dioddef na’r nifer sy’n dangos arwyddion. Maent yn cynnwys Caseous Lymphasenitis (CLA), clefyd Ovine Johne’s (OJD) a Maedi Visna (MV).
Lowri Thomas, Uwch Swyddog Cynhyrchwyr a Phrosesu yn Hybu Cig Cymru (HCC) fydd yn cadeirio’r digwyddiad. Meddai: “Mae clefydau rhewfryn yn aml heb eu darganfod mewn diadelloedd ond gallant fod yn gyfrifol am berfformiad gwael drwy golli pwysau cronig, ffrwythlondeb isel a chyfraddau twf is. Mae’n bosib mai un o nifer yw’r ddafad sy’n dangos arwyddion. Bydd gan ddiadelloedd sydd wedi’u heffeithio lefel cynhyrchu is, a gaiff effaith niweidiol ar broffidioldeb y busnes.
“Rydym ni’n edrych ymlaen at sesiwn ddiddorol a defnyddiol, a fydd yn cynnwys cyngor arbenigol ac ymarferol gan Kate Hovers. Rydym hefyd yn falch i weithio gyda Chanolfan Milfeddygaeth Cymru (WVSC) a Chymdeithas Ddefaid Genedlaethol Cymru (NSA) i dynnu sylw at fanteision offer profi newydd sbon o’r enw Enferplex.”
Cynigir y prawf gwrthgorff Enferplex gan y WVSC a’i gefnogi gan NSA Cymru.
Dylai unrhyw un a hoffai ymuno â’r weminar ddefnyddio’r ddolen ganlynol i gofrestru: https://us02web.zoom.us/webinar/register/WN_8QGc2qxGQBKxJCtd2gOLpA
