Mae Hybu Cig Cymru (HCC) yn annog ffermwyr i fod yn ymwybodol o gyngor diweddaraf Llywodraeth Cymru ynghylch y Tafod Glas a chyfyngu ar symud anifeiliaid.
O 20 Mehefin 2025 ymlaen, bydd unrhyw anifeiliaid sydd yn agored i'r clefyd (anifeiliaid cnoi cil neu gamelidau sydd yn cynnwys gwartheg, defaid, geifr, ceirw, lamas ac alpacas) sydd yn symud o Barth Cyfyngedig y Tafod Glas i Gymru i fyw ag angen trwydded symud benodol (ar gov.uk), ynghyd â phrawf cyn-symud dilys i’w dalu gan y sawl sy’n cadw’r anifeiliaid. Os yw anifail yn dangos arwyddion clinigol ar ddiwrnod y cludiant, ni all symud i Gymru.
Caiff firws y tafod glas ei drosglwyddo'n bennaf gan frathiadau gwybed ac mae'n cael effaith ar wartheg, geifr a defaid. Gall yr effeithiau ar anifeiliaid sy’n agored i niwed amrywio’n fawr. Nid yw rhai yn dangos unrhyw arwyddion nac effeithiau clinigol ond gall achosi problemau cynhyrchiant mewn eraill, ac yn yr achosion mwyaf difrifol gall achosi marwolaeth.
Dywedodd Arweinydd Darpariaeth HCC i Gynhyrchwyr a Phroseswyr, John Richards: “Byddem yn annog ffermwyr Cymru i ymgyfarwyddo â rheoliadau newydd Llywodraeth Cymru ynghylch y Tafod Glas a chyfyngiadau symud. Mae’n bosibl y bydd y cyfyngiadau hyn yn newid ac yn datblygu dros y misoedd nesaf, ac felly byddem yn annog ffermwyr i gyfeirio at Lywodraeth Cymru am y cyngor a’r wybodaeth diweddaraf.”
Ychwanegodd John: “Mae’n dda gallu dweud wrth ddefnyddwyr nad yw’r clefyd yn cael effaith ar ddiogelwch bwyd a does dim bygythiad i iechyd pobl.”
Mae modd cael hyd i gyngor Llywodraeth Cymru ar y Tafod Glas yma: https://www.llyw.cymru/polisir-tafod-glas-yng-nghymru
