Mae diet a maeth sy’n cynnwys cig coch yn chwarae rhan hollbwysig mewn beichiogrwydd – dyna oedd neges allweddol Hybu Cig Cymru (HCC) i dros 500 o fydwragedd yn ddiweddar yng Ngŵyl Mamolaeth a Bydwreigiaeth Cymru a De Orllewin Lloegr.
Roedd y digwyddiad yng Nghaerfaddon ar 17 Medi, yn canolbwyntio ar ddatblygiad proffesiynol bydwragedd drwy gyfrwng sgyrsiau, seminarau ymchwil, cyfleoedd i rwydweithio ac arddangosfeydd. Bu HCC yn ymgysylltu â bydwragedd i wneud yn siŵr bod negeseuon yn ymwneud â chig coch o ran iechyd a maeth yn cyrraedd gweithwyr iechyd proffesiynol, mamau beichiog a theuluoedd ifanc
Yn y digwyddiad, rhannodd HCC ei adnoddau diweddaraf ar gig coch sydd yn seiliedig ar dystiolaeth ar gyfer gweithwyr iechyd proffesiynol, yn ogystal â gwybodaeth, cyngor a syniadau am ryseitiau iach a chytbwys i’w rhannu â chydweithwyr, cleifion a theuluoedd.
Dywedodd Elwen Roberts, Swyddog Gweithredol HCC ar gyfer y Defnyddwyr: “Roeddem yn falch iawn o allu ymgysylltu â bydwragedd fel rhan o’n gwaith yma yn HCC. Mae gweithio gyda gweithwyr iechyd proffesiynol wedi bod yn elfen allweddol o’n strategaeth erioed ac mae bydwragedd yn darparu cymorth a chyngor mor amhrisiadwy i deuluoedd mewn cymunedau ar hyd a lled y wlad.
“Gyda hynny mewn golwg, roeddem am achub ar y cyfle i gyfleu negeseuon yn seiliedig ar dystiolaeth ynghylch cig coch a maeth sy’n berthnasol i fydwragedd a’u cleifion. Mae diet a maeth yn chwarae rhan allweddol yn ystod beichiogrwydd ac mae cig coch heb lawer o fraster fel Cig Oen Cymru a Chig Eidion Cymru yn ffynhonnell dda o brotein, sinc, haearn, magnesiwm a fitaminau B.”
Ychwanegodd Elwen: “Mae menywod beichiog mewn perygl mawr o beidio â chael digon o haearn, a gall hyn arwain at flinder, gwendid a mynd yn groendenau. Ond mae ffynonellau haearn sy’n deillio o anifeiliaid – fel Cig Oen Cymru a Chig Eidion Cymru – yn cynnwys haearn hem sy’n cael ei amsugno’n haws gan y corff ac sy’n gallu helpu’r corff i amsugno haearn o ffynonellau sy’n seiliedig ar blanhigion fel sbigoglys neu frocoli.”
Dywedodd Julie Richards, Cyfarwyddwraig Coleg Brenhinol y Bydwragedd: “Rydym i gyd yn ymwybodol o bwysigrwydd diet iach a chytbwys, ond gyda swyddi prysur, ymrwymiadau teuluol ac amser cyfyngedig, gall gwireddu hyn weithiau ymddangos yn amhosib. Y newyddion da yw y gall gwneud rhai newidiadau bach, syml i’r ffordd rydym yn siopa, yn coginio ac yn bwyta helpu i ffitio bwyta’n iach i mewn i ddiwrnod gwaith prysur.
“Mae’r wybodaeth a’r adnoddau sy’n cael eu darparu gan Hybu Cig Cymru yn ddefnyddiol i fydwragedd oherwydd maen nhw wedyn yn gallu trafod y pwnc gyda menywod beichiog a’u teuluoedd. Yn ogystal, maen nhw’n gallu rhannu syniadau sydd, gydag ychydig o flaengynllunio ymlaen llaw, yn profi y gall pryd o fwyd cyflym roi llond bol o fwyd blasus sydd hefyd yn iachus.”
