Archwiliwch wasanaethau gwartheg newydd EIDCymru yn Sioe Frenhinol Cymru
Gwahoddir ymwelwyr â Sioe Frenhinol Cymru i ddarganfod y gwasanaethau gwartheg diweddaraf sydd ar gael trwy EIDCymru, gwasanaeth olrhain symudiadau da byw ar-lein ar gyfer Cymru.
Mae EIDCymru eisoes yn gyfarwydd i ffermwyr defaid ledled Cymru, a bellach mae’n cynnig gwasanaethau i ffermwyr gwartheg. Bydd tîm EIDCymru wrth law yn y sioe i ddarparu gwybodaeth, ateb cwestiynau a helpu ffermwyr i greu eu cyfrifon gwartheg.
Ers 1 Gorffennaf 2026, mae ffermwyr gwartheg yng Nghymru yn gallu cofrestru gydag EIDCymru i wirio eu statws BVD (dolur rhydd feirysol buchol) a gweld gwybodaeth am statws y fuches ac anifeiliaid unigol. Mae system newydd EIDCymru wedi'i chynllunio i gasglu a lledaenu canlyniadau profion BVD Cymru gan ganiatáu i geidwaid gwartheg a milfeddygon i leihau'r risg o BVD ar eu ffermydd. Mae’r cymhelliad hwn dan arweiniad y diwydiant yn dangos sut y gall ffermwyr, milfeddygon a'r llywodraeth gydweithio i fonitro iechyd buchesi yn yr ymdrech i ddileu'r clefyd ledled Cymru
Er mwyn gwneud y cofrestru mor syml â phosibl, mae EIDCymru wedi cynhyrchu fideos cam-wrth-gam i arwain ffermwyr drwy'r broses o greu cyfrif. Mae modd gweld y rhain ar sianel YouTube EIDCymru: EIDCymru - YouTube
Meddai Arweinydd EIDCymru, Gwion Aeron: "Rydym yn annog pawb sy’n cadw gwartheg yng Nghymru i greu cyfrif gwartheg ar wefan EIDCymru i gael mynediad at eu canlyniadau BVD.”
Mae system BVD wedi ei datblygu ar yr un llwyfan a fydd yn cefnogi gwasanaethau cofrestru, symud a marwolaethau gwartheg a fydd yn cael eu trosglwyddo o Wasanaeth Symud Gwartheg Prydain (BCMS) i EIDCymru. Mae Gwasanaeth Gwartheg EIDCymru yn cael ei gyflwyno mewn cyfres o gamau i leihau'r risg i olrhain gwartheg Cymru a Phrydain, ynghyd â lleihau’r baich o newid ar y diwydiant, a sicrhau bod cefnogaeth briodol ar gael drwy gydol y broses. Drwy gofrestru nawr ar gyfer gwasanaeth BVD EIDCymru, bydd ceidwaid wedi cofrestru yn barod ar gyfer y gwasanaethau gwartheg unwaith y bydd BCMS yn trosglwyddo i EIDCymru.
Ychwanegodd Gwion: “Am y tro, y newid allweddol i ffermwyr yw bod gwybodaeth am statws BVD ar gael ar-lein drwy EIDCymru. Mae’n gorwedd ochr yn ochr â'r gwasanaethau ar-lein sydd eisoes ar gael ar gyfer adrodd symudiadau defaid, geifr a cheirw.
“Mae’r Sioe Fawr yn gyfle delfrydol i ffermwyr gwartheg ddysgu mwy am y newidiadau sydd ar ddod, gweld sut mae'r system yn gweithio a sicrhau eu bod yn barod ar gyfer y newid. Os oes gennych unrhyw gwestiynau neu bryderon, neu os hoffech gael cymorth i sefydlu eich cyfrif defaid neu wartheg, dewch i'n gweld yn Sioe. Bydd ein tîm ymroddedig yn hapus i’ch helpu.”
