Mae Hybu Cig Cymru (HCC) wedi amlinellu ei flaenoriaethau ar gyfer y pedair blynedd nesaf wrth gyhoeddi ei gynllun gweithredu strategol, ‘Gweledigaeth y Diwydiant Cig Coch: Darparu Gwerth i Gymru’.
Mae’r ddogfen, a gyhoeddwyd heddiw [10 Mawrth 2026], yn datgelu tri maes ffocws a fydd yn cefnogi cenhadaeth y corff ardoll o arwain a chefnogi diwydiant cig coch Cymru i gynyddu ei bresenoldeb yn y farchnad, ei wydnwch economaidd a’i gystadleurwydd byd-eang wrth ymdrechu i gael effaith amgylcheddol gadarnhaol.
Bydd y blaenoriaethau’n ceisio: cynyddu cyfaint a gwerth cig coch brand Cymru a werthir; datblygu ac arwain y gwaith o weithredu mentrau sy’n gwella cynaliadwyedd economaidd ac amgylcheddol; ac yn olaf, darparu eiriolaeth ragweithiol, gadarn a seiliedig ar dystiolaeth ar gyfer y diwydiant.
Dywedodd Cadeirydd HCC, Catherine Smith: "Gweledigaeth HCC yw diwydiant cig coch cystadleuol, proffidiol, effeithlon a chynaliadwy yng Nghymru sy'n cofleidio ei gyfrifoldebau cymdeithasol ac amgylcheddol. Bydd y Weledigaeth sydd newydd ei chyhoeddi yn gweithredu fel glasbrint i HCC gefnogi ac uno pob elfen o'n sector a'n cadwyn gyflenwi – o ffermwyr i arwerthwyr, proseswyr a'r sector bwyd ehangach – er mwyn sicrhau llwyddiant a thwf yn y dyfodol i'n diwydiant.
“Rydyn ni wedi ymrwymo i wella enw da a chystadleurwydd y sector, tra hefyd yn cyflawni ar gyfer talwyr yr ardoll, defnyddwyr a chymdeithas ehangach Cymru.”
Ymgynghorodd HCC â rhanddeiliaid o bob rhan o'r gadwyn gyflenwi cig coch i ddatblygu'r Weledigaeth, dan arweiniad y Prif Swyddog Gweithredol José Peralta. Dywedodd: "Ar ôl misoedd o drafodaethau ac ystyriaethau, pleser yw cyhoeddi ein Gweledigaeth ar gyfer y pedair blynedd nesaf ac rydyn ni’n edrych ymlaen at ddarparu’r hyn rydyn ni’n bwriadu ei gyflawni. Byddwn yn mabwysiadu dull cydweithredol, a fydd yn cynnwys gweithio gyda phartneriaid ar draws y diwydiant sy'n cael eu gyrru gan bwrpas cyffredin. Bydd hyn yn sicrhau ein bod yn gweithredu'n effeithlon ac yn effeithiol ac yn parhau i ganolbwyntio ar gyflawni canlyniadau ystyrlon."
"Mae gan HCC gylch gwaith eang, ac mae'r sector yn cyflwyno sawl her i ni sydd yn aml y tu hwnt i'n rheolaeth. Fodd bynnag, mae hefyd nifer o gyfleoedd y byddwn yn parhau i'w dilyn i hyrwyddo cynhyrchion cig coch eiconig ein gwlad."
Wrth edrych tua'r dyfodol, ychwanegodd: "Y cam nesaf fydd cyhoeddi ein Cynllun Busnes, a fydd yn amlinellu sut y bydd y strategaeth hon a'r blaenoriaethau a nodwyd yn cael eu cyflawni'n fanwl. Rydyn ni’n bwriadu cyfleu'r wybodaeth honno i'r diwydiant yn ystod cyfres o ddigwyddiadau ar gyfer rhanddeiliaid ledled Cymru ar ôl y cyfnod wyna, ddechrau'r haf."
Mae’r ddogfen Weledigaeth lawn i’w gweld ar ein gwefan: Gweledigaeth 2030 - Hybu Cig Cymru
